அரசுப் பள்ளி மாணவர்களின் கல்விக்கு அரண்: ஆண்டுக்கு ₹12,000 வழங்கும் மத்திய அரசின் NMMS ஸ்காலர்ஷிப் திட்டம்!
பொருளாதாரத்தில் பின்தங்கிய சூழலில் இருக்கும் திறமையான அரசுப் பள்ளி மாணவர்கள், நிதி நெருக்கடி காரணமாகத் தங்களின் பள்ளிப் படிப்பை எட்டாம் வகுப்போடு நிறுத்திவிடக் கூடாது என்பதற்காக மத்திய அரசால் கொண்டு வரப்பட்ட ஒரு உன்னதமான திட்டம் தான்.பள்ளிப் படிப்பை பாதியிலேயே கைவிடுவதைத் தடுத்து (Drop-out Rate), இடைநிலைக் கல்வியைத் தொடரச் செய்வதே இத்திட்டத்தின் முக்கிய நோக்கமாகும்.
1. திட்டத்தின் முக்கிய சிறப்பம்சங்கள்
(Scholarship Benefits)
ஆண்டு நிதியுதவி:
இத்திட்டத்திற்குத் தகுதி பெறும் மாணவர்களுக்கு மாதாந்திர அடிப்படையில் ₹1,000 வீதம், ஆண்டுக்கு மொத்தம் ₹12,000 கல்வி உதவித்தொகையாக நேரடியாக அவர்களின் வங்கி கணக்கில் (DBT முறை) செலுத்தப்படும்.
நீட்டிப்பு காலம்:
ஒன்பதாம் வகுப்பில் தொடங்கி (9th Std), அவர்கள் தங்களின் பள்ளிப் படிப்பை நிறைவு செய்யும் வரை (12th Std வரை) தொடர்ந்து 4 ஆண்டுகளுக்கு (9, 10, 11, 12 ஆம் வகுப்புகள்) இந்த நிதியுதவி மத்திய அரசால் வழங்கப்படும். அதாவது ஒரு மாணவருக்கு ஒட்டுமொத்தமாக ₹48,000 கல்வி உதவித்தொகை கிடைக்கும்.
2. விண்ணப்பிப்பதற்கான தகுதிகள் (Eligibility Criteria):
பள்ளித் தகுதி:
மாணவர்கள் தமிழ்நாடு அரசு, அரசு உதவி பெறும் மற்றும் உள்ளாட்சிப் பள்ளிகளில் (Govt, Govt Aided, and Local Body Schools) 8-ஆம் வகுப்பு படித்துக் கொண்டிருக்க வேண்டும்.
மதிப்பெண் வரம்பு:
மாணவர்கள் தங்களின் 7-ஆம் வகுப்பு ஆண்டு இறுதித் தேர்வில் குறைந்தபட்சம் 55% மதிப்பெண்கள் (SC/ST மாணவர்களுக்கு 50%) பெற்றிருக்க வேண்டும்.
பெற்றோர் வருமான வரம்பு:
மாணவர்களின் பெற்றோரது ஆண்டு வருமானம் அனைத்து ஆதாரங்களையும் சேர்த்து ₹3,50,000-க்குள் (ரூபாய் மூன்று லட்சத்து ஐம்பதாயிரம்) இருக்க வேண்டும்.
யாரெல்லாம் விண்ணப்பிக்க முடியாது?:
கேந்திரிய வித்யாலயா (KV), நவோதயா பள்ளிகள் (JNV), மத்திய அரசு நடத்தும் பிற குடியிருப்புப் பள்ளிகள் மற்றும் தனியார் சுயநிதிப் பள்ளிகளில் படிக்கும் மாணவர்கள் இத்திட்டத்திற்கு விண்ணப்பிக்கத் தகுதியற்றவர்கள் ஆவர்.
3. தேர்வு முறை (Selection & Examination Process):
இத்திட்டத்திற்குப் பயனாளிகளைத் தேர்வு செய்ய மாநிலத் தேர்வுகள் இயக்ககம் (DGE) மூலம் ஆண்டுதோறும் ஒரு பிரத்யேக ‘NMMS திறனாய்வுத் தேர்வு’ நடத்தப்படுகிறது. இந்தத் தேர்வு இரண்டு தாள்களைக் கொண்டது:
தாள் 1:
மனத்திறன் தேர்வு (MAT – Mental Ability Test)
இதில் மாணவர்களின் பகுத்தறியும் திறன், சிந்திக்கும் திறன் மற்றும் தர்க்கரீதியான திறன்களைச் சோதிக்கும் வகையில் 90 கொள்குறி வகை (Objective Type / MCQ) கேள்விகள் கேட்கப்படும்.
பாடப்பகுதிகள்:
எண்களின் வரிசை (Number Series), குறியீடுகள் (Coding-Decoding), ஒத்தத்தன்மை (Analogy), வென் வரைபடங்கள் (Venn Diagrams) மற்றும் மறைந்திருக்கும் உருவங்கள்.
தாள் 2:
படிப்பறிவுத் திறன் தேர்வு (SAT – Scholastic Aptitude Test)
இதில் மாணவர்கள் 7 மற்றும் 8 ஆம் வகுப்புகளில் படிக்கும் பாடப்பகுதிகளில் இருந்து 90 கொள்குறி வகை கேள்விகள் கேட்கப்படும்.
பாடப்பிரிவுகள்:
அறிவியல் (Science) – 35 கேள்விகள்
சமூக அறிவியல் (Social Science) – 35 கேள்விகள்
கணிதம் (Mathematics) – 20 கேள்விகள்
தேர்ச்சி மதிப்பெண்:
ஒவ்வொரு தாளிலும் மாணவர்கள் தனித்தனியாகக் குறைந்தபட்சம் 40% மதிப்பெண்கள் (SC/ST மாணவர்களுக்கு 32%) பெற்றுத் தேர்ச்சி பெற வேண்டும். இந்தத் தேர்ச்சியின் அடிப்படையில் மாநில வாரியாக உருவாக்கப்படும் தரவரிசைப் பட்டியலின்படி (Merit List) தகுதியான மாணவர்கள் ஸ்காலர்ஷிப்பிற்குத் தேர்வு செய்யப்படுவார்கள்.
4. உதவித்தொகை தொடர்வதற்கான நிபந்தனைகள்:
தேர்வில் வெற்றி பெற்றவுடன் மட்டும் உதவித்தொகை தொடர்ந்து கிடைத்துவிடாது. அடுத்தடுத்த வகுப்புகளில் உதவித்தொகை நீடிக்க சில நிபந்தனைகள் உள்ளன:
மாணவர் 9-ஆம் வகுப்பிலிருந்து அடுத்தடுத்த வகுப்புகளுக்குத் தடையின்றித் தேர்ச்சி பெற வேண்டும்.10-ஆம் வகுப்பு பொதுத்தேர்வில் குறைந்தபட்சம் 60% மதிப்பெண்கள் (SC/ST மாணவர்களுக்கு 55%) பெற்றுத் தேர்ச்சி பெற்றால் மட்டுமே 11 மற்றும் 12-ஆம் வகுப்புகளுக்கான உதவித்தொகை தொடர்ந்து வழங்கப்படும்.மாணவர்கள் இந்தியாவிற்குள் உள்ள அங்கீகரிக்கப்பட்ட பள்ளிகளில் மட்டுமே தங்களின் மேல்நிலைக் கல்வியைத் தொடர வேண்டும்.
