UP-ல் MBBS, BDS இன்டர்ன்களுக்கு ரூ.25,000 மாத ஊதியம்!
உத்தரப் பிரதேசத்தில் MBBS மற்றும் BDS படிப்பை முடித்து கட்டாய சுழற்சி பயிற்சியில் (Rotatory Internship) இருக்கும் மாணவர்களுக்கு வழங்கப்படும் மாதாந்திர உதவித்தொகை ரூ.12,000-ல் இருந்து ரூ.25,000 ஆக உயர்த்தப்பட்டுள்ளது. இந்த முடிவுக்கு உத்தரப் பிரதேச அமைச்சரவை ஒப்புதல் அளித்துள்ளது.
3,928 இன்டர்ன்களுக்கு பயன்
இந்த உதவித்தொகை உயர்வின் மூலம் உத்தரப் பிரதேசத்தில் உள்ள அரசு மருத்துவக் கல்லூரிகள், மருத்துவ நிறுவனங்கள் மற்றும் மருத்துவப் பல்கலைக்கழகங்களில் பயிற்சி பெறும் சுமார் 3,928 MBBS மற்றும் BDS இன்டர்ன்கள் பயனடைவார்கள்.
எவ்வளவு உயர்வு?
இதற்கு முன்பு MBBS மற்றும் BDS இன்டர்ன்களுக்கு மாதம் ரூ.12,000 வழங்கப்பட்டு வந்தது. தற்போது அது இரட்டிப்புக்கும் அதிகமாக உயர்த்தப்பட்டு ரூ.25,000 ஆக நிர்ணயிக்கப்பட்டுள்ளது. புதிய தொகை ஆகஸ்ட் 25, 2026 முதல் அமலுக்கு வரும் என தெரிவிக்கப்பட்டுள்ளது.
கட்டாய பயிற்சி
MBBS மற்றும் BDS படிப்பை முடித்த பிறகு, மாணவர்கள் மருத்துவமனைகளில் சுழற்சி முறையிலான கட்டாய பயிற்சியை மேற்கொள்கின்றனர். இந்த காலகட்டத்தில் வார்டுகள், OPD, அவசர சிகிச்சைப் பிரிவுகள் உள்ளிட்ட பல்வேறு பணிகளில் மருத்துவர்களுடன் இணைந்து பணியாற்றுகின்றனர்.
மாணவர்களுக்கு நிவாரணம்
இன்டர்ன்ஷிப் காலத்தில் மருத்துவ மாணவர்கள் நீண்ட நேரம் மருத்துவமனைகளில் பணியாற்ற வேண்டியிருப்பதால், உதவித்தொகை உயர்வு அவர்களுக்கு நிதி ரீதியாக உதவியாக இருக்கும் என எதிர்பார்க்கப்படுகிறது. இந்த முடிவு மருத்துவ இன்டர்ன்களின் நீண்டகால கோரிக்கைக்கு கிடைத்த முக்கிய நிவாரணமாக பார்க்கப்படுகிறது.
