ஆதார் கார்டு வைத்திருப்பவர்கள் கவனத்திற்கு – வேறு யாராவது பயன்படுத்தினால் கண்டறிவது எப்படி?
ஆதார் என்பது ஒவ்வொரு தனி நபரின் தனித்துவமான அடையாளத்தை நிறுவும் நோக்கத்திற்காக இந்திய அரசாங்கத்தின் சார்பாக இந்திய தனித்துவ அடையாள ஆணையம் தனிநபர்களுக்கு வழங்கிய தனிப்பட்ட அடையாள எண் ஆகும். இது இந்தியாவில் எங்கும் அடையாளம் மற்றும் முகவரிக்கான சான்றாக செயல்படுகிறது. இத்தகைய முக்கியத்துவம் வாய்ந்த ஆதார் கார்டில் அங்கீகார வரலாற்றை சரிபார்ப்பது மிகவும் எளிமையானது. அதற்கான சுலபமான வழிமுறைகள் பற்றி இப்பதிவில் பார்க்கலாம்.
எளிய வழிகள்:
ஆதார் அட்டை என்பது ஒவ்வொரு குடிமகனுக்கும் இன்றியமையாத ஆவணமாகும். இது அத்தியாவசிய அடையாளச் சான்றுகளில் ஒன்றாகும். அனைத்து அரசுப் பணிகளுக்கான, திட்டங்களைப் பயன்படுத்துவதற்கும் ஆதார் அட்டை மிகவும் முக்கியமானது. ஆதார் எண் கிட்டத்தட்ட எல்லா இடங்களிலும் கேட்கப்படுகிறது. இந்திய தனித்துவ அடையாள ஆணையம் (UIDAI) வழங்கிய ஆதார் அட்டையில் குடிமக்களின் பயோமெட்ரிக் மற்றும் மக்கள் தொகை தகவல்கள் உள்ளிடப்பட்டுள்ளன. ஒவ்வொரு இந்தியரின் வங்கிக் கணக்கும் அவர்களின் ஆதார் அட்டையுடன் இணைக்கப்பட்டுள்ளதால் பணப் பரிவர்த்தனைகளுக்கும் ஆதாரைப் பயன்படுத்தலாம்.
தற்போது, ஆன்லைன் மோசடிகள் அதிகரித்து வருவதால், ஆதார் தவறாகப் பயன்படுத்தப்படுவதாக குற்றச்சாட்டு எழுந்து உள்ளது. செல்போனில் பேசி மற்றவர்களை நம்ப வைத்து ஆன்லைன் பரிவர்த்தனை மூலம் பண மோசடி, வங்கியில் இருந்து பேசுவதாக கூறி ரகசிய குறியீட்டு எண்ணை பெற்று பணத்தை எடுப்பது போன்ற சைபர் குற்றங்கள் அதிகரித்து வருகிறது. இந்த மோசடிகளில் இருந்து தற்காத்து கொள்ள UIDAI இன் இணையதளம் பயன்படுகிறது. இந்த தளம் மூலம் அதிகபட்சமாக 50 அங்கீகார பதிவுகள் அல்லது கடந்த ஆறு மாதங்களில் உங்கள் ஆதார் எண், அங்கீகாரத்திற்காக எங்கு பயன்படுத்தப்பட்டது என்பதை தெரிந்துகொள்ளலாம்.
1.முதலில் ஆதார் அங்கீகார வரலாற்றைக் கிளிக் செய்ய வேண்டும்.
2.இங்கே 12 இலக்க ஆதார் எண் மற்றும் நான்கு இலக்க பாதுகாப்பு குறியீட்டை உள்ளிடவும்.
3.இப்போது Generate OTP என்பதைக் கிளிக் செய்யவும். அதன் பிறகு, உங்கள் மொபைல் எண்ணுக்கு OTP வரும்.
4.இப்போது இணையதளத்தில் புதிய பக்கம் திறக்கும். அங்கீகார வகையை உள்ளிடவும், தேதி , பதிவுகளின் எண்ணிக்கை மற்றும் OTP ஆகியவற்றைத் தேர்ந்தெடுக்கவும்.
5.இப்போது கீழ்தோன்றும் மெனுவிற்குச் சென்று அனைத்து தெரிவுகள் என்ற விருப்பத்தைத் தேர்ந்தெடுக்கவும். அதன் பிறகு, பக்கத்தில் தேதி வரம்பைத் தேர்ந்தெடுக்கவும்.
6.இங்கு ஆறு மாதங்களில் பயன்படுத்தப்பட்ட விவரங்கள் இருக்கும்.
7.இப்போது சமர்ப்பி பொத்தானை (submit button) அழுத்தி தேவையான அனைத்து தகவல்களையும் நிரப்பவும். உங்கள் ஆதார் அட்டை எங்கு, எப்போது பயன்படுத்தப்பட்டது என்ற விவரங்களை தெரிந்துக் கொள்ளலாம்.